睇《一秒拳王》，還香港一個票房奇蹟
除咗海報上面果一句短短嘅comment，我想講多兩句：《一秒拳王》我睇優先場，到出字幕嗰一刻，我喊咗出嚟，喺咁嘅時勢，咁嘅氣候底下，依然有人唔止唔偷雞，仲”俾多咗”去拍一套港產片，一個導演帶領整個製作團隊都”俾多啲俾多啲再俾多啲” 係非常困難，呢套電影我冇嘢好挑剔，只能夠同你講唔入場睇會係一個遺憾。
幾個月前，《一秒拳王》只係遲過《鬼滅之刃》少少上畫，我本來想呼籲睇過《鬼滅之刃》嘅香港觀眾，都應該睇《一秒拳王》，還香港一個票房奇蹟，給予後起香港電影工作者一個希望，但可惜上畫當日撞正戲院因為防疫政策而再停運，到今次正式上畫之前幾日， UA院線又宣布結業，真係一波幾折，唔緊要，就好似套戲想帶俾香港人嘅訊息一樣，寄望香港人同套戲都可以逆流而上。
見到恒仔就算生日正日都跑五六場去謝票，就係香港電影未死晒嘅證據(係，只係未死晒)，香港電影返唔返到以前咁風光，首先靠觀眾，其次靠導演。
一個愛香港嘅香港導演拍一套地地道道好睇有娛樂性嘅港產片，咁你都唔睇，就唔好話自己好撚鍾意香港，收返埋你嗰啲口號紀念品佢。
Search